Presidenti i Serbisë, Aleksandër Vuçiç, ka vazhduar mbrojtjen e tij për nënkryetarin e Listës Serbe, Milan Radoiçiç, i cili është në listën e zezë të Shteteve të Bashkuara të Amerikës.
“A është ai akademik – jo, nuk është, a ishte gjithmonë i gatshëm të luftonte për popullin – po”, kështu e përshkruan ai të sanksionuarin e ShBA-ve.
Ndërsa, në mbrojtje e sipër të Radoiçiç-it, kreu serb tha se ndaj tij frikësohen “ata që tentojnë t’iu shkaktojnë dëme serbëve që jetojnë në Kosovë”.
“E di se sa i frikësohen Milan Radoiçiç-it ata që pushtojnë veriun për të vrarë serbët, nuk gënjeva. Ju keni dhjetëra e dhjetëra shkresa në të gjitha shërbimet tona që e vërtetojnë pa mëdyshje. A është ai akademik, jo nuk është; a ishte gjithmonë i gatshëm të luftonte për popullin – po ishte”, tha Vuçiç.
Përkundër se Radoiçiç kërkohet nga institucionet e Kosovës për një numër të veprave kriminale, ai është edhe në listën e zezë të ShBA-së, por këto nuk i bëjnë përshtypje presidentit serb Vuçiç.
“Nëse dini diçka, raportoni tek autoritetet, mos flisni marrëzi në televizion. Ata nuk do të mbrohen, as Radoiçiç e as askush tjetër. Por, është e imja të kujdesem se si do të jetojnë serbët në Kosovë”, thotë Vuçiç.
Kujtojmë se Zyra e Kontrollit të Pasurive të Huaja e Departamentit të Thesarit të SHBA-së i ka shënuar Zvonko Veselinoviçin, vëllain e tij Zharko, Milan Radoiçiçin, Zheljko Bojiçin dhe Marko Rosiçin për përkatësi në rrjete korruptive të lidhura me krimin e organizuar.
Po ashtu, Sekretari i Jashtëm i Britanisë së Madhe, James Cleverly, kishte njoftuar me 9 dhjetor të vitit të kaluar një valë të re sanksionesh ndaj aktorëve të korruptuar dhe ata të cilët shkelin dhe abuzojnë të drejtat e njeriut, si dhe autorët e dhunës seksuale në mbarë botën.
Në listën e të sanksionuarve ishin edhe politikanët dhe biznesmenët serbë që veprojnë në Kosovë, Milan Radoiçiç dhe Zvonko Veselinoviç, të cilët Qeveria e Britianisë së Madhe i ka përshkruar si anëtarë të Grupeve të Organizuara Kriminale.