Kryetari i degës së PDK-së në Skenderaj, Sami Lushtaku sot ka mbledhur qindra simpatizantë të kësaj partie në një tubim parazgjedhor në Qiriez.
Në bazë të fotografive të publikuara në Facebook nga Lushtaku vërehet se aty ka qindra persona dhe se nuk ka distancë sipas masave të Qeverisë.
“Qirezi ka qenë bazë e luftëtarëve të UÇK-së dhe strehë e shumë refugjatëve gjatë luftës. Këta burra e gra bujare, kanë dhënë shumë për lirinë dhe pavarësinë e Kosovës. Sot para shumë qytetarëve të kësaj bashkësie lokale, prezentuam një projekt madhështor i cili do të ndryshojë Qirezin për të mirë”, ka shkruar Lushtaku në Facebook.
Lushtaku ishte kandidat i PDK-së për kreytar të Skenderajt, por Komisioni Qendror i Zgjedhjeve ia ka pamundësuar Sami Lushtakut kandidimin për kryetar të Skenderajt për shkak të dy dënimeve të formës së prerë në periudhën brenda 3 viteve të fundit.
Ai sot, përmes një video-adresimi ka treguar se pavarësisht që nuk u certifikua, ai do të jetë në krye të Skenderajt pas zgjedhjeve të 17 tetorit,pa dhënë sqarime të mëtutjeshme.