Aktivistë të Lëvizjes Vetëvendosje po refuzohen që të kandidojnë për kryetar të degëve të ndryshme, për shkak se nuk përkrahin martesat mes gjinive të njëjta. “Islamistët” që iu bashkuan kësaj partie, sipas profesorit Milazim Krasniqi, shkuan me hile në partinë e Albin Kurtit.
Krasniqi përmes një shkrimi në llogarinë e tij në Facebook, ka thënë se “islamistët” e kanë ditur ku kanë hyrë kur iu bashkuan Lëvizjes Vetëvendosje.
“Albini ua ka hapur derën me hile edhe ata kanë shkuar te Albini me hile”, ka thënë ai.
Në fund, profesori Krasniqi ka thënë se të njëjtëve, u ka mbetur që të kërkojnë falje te Zoti për dëmin e bërë ndaj shoqërisë.
Postimi i plotë i Krasniqit:
Albin Kurti ka thënë një fjali shumë domethënëse në kuadër të zgjedhjeve më të fundit në LVV:”Natyrisht, ne jemi një parti socialdemokrate. Si të tillë nuk mund të jemi ideologjikisht gjithëpërfshirës.” Ata që patën bërë hyxhym për në LVV, veçmas “islamistët”, e kanë ditur me kohë se ku kanë hyrë. Albini ua ka hapur derën me hile edhe ata kanë shkuar te Albini me hile. Tash atyre u mbetet të kërkojnë falje te i lumi Zot, për dëmin që i kanë bërë shoqërisë. Nëse mimikria gjatë kësaj kohe nuk ua ka zbehë edhe besimin.
