Nga dita e nesërme nuk do të ketë transport të udhëtarëve urban dhe ndërurban në gjithë vendin për shkak të mospërmbushjes së marrëveshjes ndërmjet Shoqatës së Transportit të Udhëtarëve dhe Ministrisë së Infrastrukturës për subvencionin e operatorëve në këtë sektor.
Në një njoftim tregohet se në grevë do të futen të gjithë operatorët.
“Arsyeja e grevës është Qeveria dhe Ministritë përkatëse nuk e kanë zbatuar marrëveshjen e nënshkruar më datën 28.01.2021 për subvencionimin e trasnportuesve”, thuhet në njoftim.
Ndërkohë, më herët kryetari i shoqatës, Ruzhdi Kurtishaj, ka paralajmëruar se protesta do të vazhdojë në forma të ndryshme, derisa të përmbushen kërkesat.
Ndryshe, duhet theksuar se kompanitë e transportit deri tash kanë punuar me gjysmë kapaciteti, pasi ligji nuk ka lejuar shumë persona nëpër autobusë.
