Kryeministri i Republikës së Shqipërisë, Edi Rama, ka bërë një reagim mjaft të ashpër në lidhje me festën e madhe për fitoren e Zvicrës ndaj Serbisë. Por, duket se në këtë reagim ka shprehur qëndrime të cilat dikur nuk i mbante as vetë.
Mes tjerash, kryeministri i Republikës së Shqipërisë Rama e quajti “mënyrë aspak dinjitoze” festën e bërë nga kosovarët të premten, mes të cilëve ishte edhe kryeministri Albin Kurti.
Ai madje shkoi aq larg duke përmendur edhe cilësorë të tjerë në fjalën e tij si “nacionalizëm qesharak e të rrezikshëm”.
“Si mund të shkëputen nga skuadra e tyre dy lojtarë që janë qytetarë të atij shteti, dhe për atë arsye luajnë me atë skuadër, për shkak të kombësisë së tyre, të përdoren si mish për top. Për një lojë luftash ballkanike, është…” – kishte thënë mes tjerash kryeministri Rama.
Një ‘shkëputje’ të tillë të dy lojtarëve, Xhakës e Shaqirit, e kishte bërë kryeministri ynë Albin Kurti mbrëmjen e së premtes duke shkruar: “Serbia nuk kalon. Urime Zvicrës!”.
Megjithatë, po të njëjtën shkëputje e kishte bërë edhe Edi Rama më 22 qershor të vitit 2018, kur Zvicra e kishte mposhtur Serbinë në Kupën e Botës “Rusia 2018”.
“Foto e ditës” – kishte shkruar ai, me dy figura duke qeshur dhe derisa dukeshin Xhaka e Shaqiri duke bërë shqiponjën me duar. Të dy lojtarët kishin shënuar gola në atë mbrëmje që kishte përfunduar 2-1 për Zvicrën.
Për më tepër, Edi Rama – që edhe anë atë kohë ishte kryeministër – kishte hapur llogari bankare për t’i paguar gjobën prej 21 mijë e 500 eurove dy lojtarëve të Zvicrës me origjinë shqiptare. Ai e kishte cilësuar veprimin si simbolik.
Kryeministri i Kosovës, ndërkohë, edhe më 22 qershor 2018 kishte shkruar për Xhakën e Shaqirin. Ai thoshte se Vetëvendosje “do t’i bashkonte kampionatet me Shqipërinë, me synim përfundimtar njësimin e kombëtareve.”
Kurti godiste edhe politikanë që sipas tij po gëzoheshin ani pse “bënin pazare dhe kontrabandë me Serbinë, që kanë dëmtuar vazhdimisht Kosovën në pjesëmarrjen në negociaza pa parime”.
Çka tha tjetër Rama?
Rama tha se po ta bënte veprimin (që siç thamë e ka bërë), do t’i “fryenze zjarrit të një nacionalizmi – më falni për shprehjen – qesharak.”
“Por, nacionalizmi është gjithmonë sa qesharak aq i rrezikshëm. Nuk është e nevojshme, nuk e shoh të nevojshme, mendoj që kush e bën këtë nuk bënë gjënë e duhur.” – u shpreh ai kur u pyet pse nuk kishte bërë asnjë reagim pas fitores së Zvicrës kundër Serbisë.
“Nuk kuptoj realisht pse duhet të flisja, nuk jam kryeministër i Zvicër, jam kryeministër i Shqipërisë, dhe nëse do të ndaja nga skuadra kombëtare dy qytetarë zviceranë që janë shqiptarë të cilët ne i shohim me dashuri dhe simpati të madhe që të gjithë, për një ndeshje të veçantë, çfarë do të bëja konkretisht, do t’i përdorja ato figura për politikë.” – vijoi më tej ndërkohë.
Nuk dihet nëse kryeminsitri Kurti kishte reaguar për fitoren e Zvicrës ndaj Serbisë edhe më 22 qershor të vitit 2018.