Kryetari i LDK-së, Lumir Abdixhiku ka folur edhe një herë rreth qëndrimit të partisë së tij për formimin e institucioneve dhe për çështjen e presidentit.
I pyetur nëse LDK do t’ia bëjë kuorumin Vjosa Osmanit për presidente, Abdixhiku ka thënë se partia që ai drejton synon t’i shmangë zgjedhjet, të kontribuojë në formimin e institucioneve dhe ato të jenë demokratike dhe t’i përfaqësojë të gjitha partitë politike, në veçanti pozita e presidentit, shkruan Reporteri.net.
“Nesër siç e dini e kemi takimin bilateral, besoj që gjatë vikendit do t’i themelojmë organet e partisë, kryesinë dhe aty do të marrim vendim për këtë çështje.
Ajo çfarë kam thënë është që LDK synon t’i shmangë zgjedhjet, të kontribuojë në formimin e institucioneve dhe ato të jenë demokratike dhe ti përfaqësojë të gjitha partitë politike, në veçanti pozita e presidentit. Kemi qëllim t’i shmangim zgjedhjet tashmë të përsëritura e të mërzitura tashmë për qytetarë”, u shpreh Abdixhiku para gazetarëve.
Tutje Abdixhiku tha se e konsideron sjellje të mirë të opozitës takimin e nesërm.
“Është sjellje e mirë prej opozitës, është mirë që po takohemi. Të shohim se çka do të ndodhë në takim”, u shpreh Abdixhiku.
