Presidenti turk, Rexhep Erdogan, tha të premten se vendi i tij nuk është në favor të anëtarësimit të Finlandës dhe Suedisë në NATO, duke dhënë shenjë se Turqia mund ta përdorë statusin e saj si anëtare e aleancës për ta bllokuar me veto anëtarësimin e dy shteteve të Evropës Veriore.
“Jemi duke i ndjekur zhvillimet në lidhje me Suedinë e Finlandën, por nuk kemi opinion të favorshëm”, tha presidenti turk para gazetarëve.
Udhëheqësi i shtetit e arsyetoi kundërshtimin duke e përmendur përkrahjen e pretenduar të Suedisë dhe të vendeve të tjera skandinave për militantët kurdë dhe grupet e tjera, të cilët Turqia i cilëson terroriste.
Ai gjithashtu tha se nuk dëshiron që ta përsërisë “gabimin” e Turqisë në të kaluarën, kur vendi i tij ishte pajtuar që ta ripranonte Greqinë në NATO më 1980. Ai pretendoi se ky veprim e kishte lejuar Greqinë që “të merrte qëndrim kundër Turqisë duke e marrë NATO-n pas vetes”, raporton agjencia “Associated Press”.
Presidenti turk nuk tha haptazi se do ta bllokonte ndonjë përpjekje të Suedisë e Finlandës për anëtarësimin në NATO, por aleanca i merr të gjitha vendimet me pajtueshmëri të plotë të shteteve të saj, që do të thotë se secila anëtare e ka të drejtën e vetos për ta bllokuar pranimin e ndonjë shteti të ri.
Sekretari i përgjithshëm i NATO-s, Jens Stoltenberg, ka thënë se Finlanda dhe Suedia do të priteshin krahëhapur, nëse aplikojnë zyrtarisht për anëtarësim në organizatën më të madhe të sigurisë në botë./Nacionale