Qendrat e hendbollit po i lëpijnë buzët e gishtat dhe po e lakmojnë një qytet siç është Istogu për nga organizimi e shikueshmëria.
Istogu i shpërbleu tifozët me fitore bindëse me rezultat 32:22 ndaj kampiones në fuqi, Vushtrrisë, në ndeshjen e parë të gjysmëfinales së play-off-it të Superligës së Kosovës (femrat).
Ky klub u themelua në vitin 2004, ende nuk i ka mbushur 2 dekada, ka një titull e tri Kupa të Kosovës, tani është favorite për të gjitha trofetë.
Pak kanë rëndësi trofetë, se sa atmosfera dhe një qytet që po jeton me hendbollin. Treguesi më i mirë është ndeshja e mbrëmshme, palestra përplot shikues.
Puna vetëmohuese e kryetrajnerit Faruk Shala, me stafin e tij dhe sponsorët, qytetarët, sot ka bërë një Istog shumë të respektuar, aq me tepër e lakmojnë edhe qendrat e hendbollit, si Ferizaj, Mitrovica, Gjilani, Gjakova, Vushtrria etj.
Istogu jeton me aromën e hendbollit, jeton me ndeshjet e vashave të tyre.
Istogu për 22 ndeshje në kampionat ka shënuar po aq fitore, tani edhe në play-off, ka rresht 23 fitore, pa barazim e pa humbje në kampionat.