Nuk janë të rralla rastet kur Policia e Kosovës njoftohet nga QKUK-ja apo spitalet e përgjithshme për të miturat që dërgohen në këto institucione shëndetësore për të lindur. Një rast i tillë ka ndodhur edhe sot, pasi një e mitur shtatzënë ishte dërguar në repartin e Gjinekologjisë në Spitalin e Pejës, raporton Gazeta Sinjali.
Burimet e Sinjalit brenda spitalit kanë bërë të ditur për Sinjalin se e mitura që lindi fëmijën është një 16-vjeçare, e cila ka mbetur shtatzënë gjatë periudhës kur kishte bashkëjetuar me një 22-vjeçar.
Burimet thonë se Policia është njoftuar për rastin nga spitali, me ç’rast është marrë deklarata e të miturës lidhur me babain e foshnjës. E njëjta i ka njoftuar zyrtarët policorë se fëmija është i V.Sh., 22-vjeçar, me të cilin është ndarë që katër muaj.
Si rezultat i denoncimit, Policia ka njoftuar Prokurorin, me urdhër të së cilit është iniciuar rasti “bashkësia jashtëmartesore me personin nën moshën 16-vjeç”.