Ministri i Bujqësisë, Faton Peci, ka vizituar sot fshatin Shestë në rajonin e Dukagjinit, nga ku ka postuar disa fotografi interesante.
Ministri mitrovicas shihet duke ndihmuar një blegtor në qethjen e deleve, shkruan Jepi Zë.
Me rastin e vizitës së tij ai ka shkruar në facebook për rolin e rëndësishëm të blegtorisë në zhvillimin ekonomik.
Ai tha se synim i tij është krijimi i kushteve që produktet blegtorale vendore të jenë të gatshme edhe për eksport.
Postimi i plotë i Faton Pecit:
“Një traditë shekullore e Bjeshkëve të Dukagjinit është edhe qethja e deleve. E sot pata kënaqësinë që ta shoh më nga afër këtë proces në Shestë të Bjeshkës së Lipës tek stanet e Metë Limanit.
Qethja është një traditë e rëndësishme në vargun e ceremonive të veprimtarisë blegtorale e cila simbolizon shtimin e begative e të mirave për familjet që mbarështojnë gjedhe.
Duke qenë se blegtoria është një nga sektorët më të rëndësishëm për zhvillim ekonomik, synimet e mia si Ministër janë që përmes politikave të duhura dhe mbështetjes financiare t’i kontribuojmë rritjes së cilësisë së qumshtit, mishit dhe nën-produkteve të tyre në mënyrë që përveç tregun vendor; të krijojmë kushte të favorshme edhe për eksport.
Përmes kultivimit të traditave autoktone dhe racës autoktone ne i shërbejmë ruajtjes së identitetit dhe krijimit të mundësive të reja për zhvillim të agro-turizmit.”