Të dielën do të arrijnë në Kosovë dozat e para të vaksinës kundër koronavirusit.
Bëhet fjalë për 24 mijë doza të vaksinës së AstraZenecas, që në Kosovë vijnë nëpërmjet programit “COVAX”.
Nuk është bërë e ditur ora e arritjes së kontigjentit të parë.
COVAX-i kishte premtuar mbi 100 mijë doza të vaksinës për Kosovën, që është vendi i vetëm në Evropë që ende s’ka nisur vaksinimin.
Autoritetet e Kosovës kishin premtuar nisjen e vaksinimit qysh për muajin shkurt, por kjo s’ishte realizuar.
Deri tash në Kosovë janë regjistruar 87 mijë e 67 raste pozitive me COVID-19. Prej tyre, 1830 kanë humbur betejën me virusin.
Presidentja e Komisionit Evropian, Ursula von der Leyen, ka diskutuar me kryeministrin Albin Kurtin për shpërndarjen e vaksinave anti-COVID në Kosovë, ku ka paralajmëruar ardhjen e tyre për punonjësit shëndetësorë dhe njerëzit që kanë më tepër nevojë.