Në Kuvendin e Kosovës ka dështuar të zgjidhet gjykatës i Gjykatës Kushtetuese.
Në raundin e tretë të votimit, votuan 94 deputetë, ku shtatë fletëvotime ishin të pavlefshme.
Kandidati Vigan Qorolli mori 49 vota kurse Haxhi Xhemajli mori 38 vota.
Nënkryetarja e Kuvendit të Kosovës, Saranda Bogujevci tha se asnjëri nga kandidatët nuk ka marrë votat e mjaftueshme prandaj konkursi do të përsëritet.
Me përfundimin e numërimit të votave, përfundoi edhe seanca plenare e Kuvendit të Kosovës.
Të dy ishin pjesë e listës së ngushtë të kandidatëve që të enjten iu prezantuan deputetëve të Kuvendit të Kosovës.
Nga tre kandidatë që ishin në garë sot, Qorrolli i priu garës në raundin e parë me 50 vota. Nga 18 vota patën Hilmi Jashari dhe Haxhi Xhemajli. Pasi Jashari e Xhemajli kishin rezultat të barabartë, Komisioni i Kuvendit propozoi votim të dytë për të caktuar kandidatin rival të Qorrollit në garën finale.
Në raundin pasues, Xhemajli mori 44 kundrejt 29 sa mori Jashari.
Në propozimin që Komisioni i posaçëm për shqyrtim të kandidatëve për emërim si gjyqtarë të Kushtetueses, Qorrolli u prezantua si emri me më së shumti pikë nga testimi me shkrim dhe intervistimi me gojë.
Fillimisht ishin katër emra në listën e ngushtë, por Visar Morina u tërhoq para seancës së Kuvendit.
Garës për gjyqtar ia kishin mësyrë 11 persona.