Kryetarit të Lidhjes Demokratike të Kosovës, Lumir Abdixhikut, nuk i ka pëlqyer takimi informuar ndërmjet kryeministrit të Kosovës, Albin Kurtit dhe partive opozitare për çështjen e dialogut Kosovë-Serbi.
Abdixhiku përpos që takimin në fjalë e ka cilësuar si shumë të vonuar, ai ka potencuar se partitë opozitare janë informuar në detaje nga ndërmjetësuesi Miroslav Lajçak në masën shumë më të thellë sesa çfarë ka informuar sot kryeministri.
“Konsideruam se kjo ftesë është e vonshme meqenëse vjen po thuajse dy javë pas takimit”, ka thënë Abdixhiku pas përfundimit të takimit.
Sipas Abdixhikut prezantimi, Kurtit, për sa i përket dialogut nuk ka pasur ndonjë risi.
“Kryeministri Kurti bëri një prezantim të gjashtë pikave që tashmë janë të njohura për publikun”.
Sipas Abdixhikut, dialogu teknik ushqen status-quon, prandaj Kosova duhet të përqendrohet në marrëveshjen përfundimtare.
“Dialogimi i copëzuar pjesë pjesë është interes vetëm i Serbisë dhe jo i Kosovës, prandaj sa më shumë që Kosova merret me marrëveshje teknike sa më tepër që mbesim në këtë proces, Kosova ushqen status-quon, ushqen interesat që nuk vijnë në frymën të cilën dëshirojmë ta ndërtojmë”, ka thënë Abdixhiku.
Po ashtu, tha se Kurtit i kanë kërkuar që të raportojë në Kuvend të Kosovës para se të shkojë në dialog dhe pasi që të kthehet.
“Dhe ai u pajtua për këtë. Përtej kësaj, presim që procesi i dialogut të marrë hapa të rinj zhvillimor”, përfundoi Abdixhiku.